Kapolisan sa Lapu-Lapu milampos sa kampanya

CEBU, Philippines - Milampos  og  dyutay  ang  kapolisan sa dakbayan sa Lapu-Lapu  sa ilang  kampanya  nga "zero injury"  sa mga pabuto  ang  taga  Lapu-Lapu  sa pagsugat sa Bag-ong Tuig 2014.

Matud pa ni Lapu-Lapu City Police Office Director P/SSupt. Rey Lyndon Lawas   nga  kini  tungod  kay gihugtan  nila  pagmonitor   ang  baligyaanan  og  illegal nga pabuto sa  maong dakbayan.

Hinuon  kadtong  ilang  nasakpan ilang  gibasa  og  tubig  ang  pabuto  ug  nawad-an  kini  og  pulos  kay wa na ikabaligya sa tag-iya.  Gumikan niini mapasalamaton si SSupt. Lawas kay  dili  kaayo  daghan  ang   natalang biktima sa pabuto   sa Lapu-Lapu.

Gani  tulo lamang ang nabiktima sa pabuto   nga  milandig sa tambalanan kung itandi sa milabay’ng tuig 2012.

Sa milabay’ng adlaw mihimo na usab og subling pag-inspection ang mga sakop sa FEASAGS 7, BFP ug ang kapolisan sa Lapu-Lapu sa  mga ‘ firecracker zone’ sa   mga  kabarangayan  sa dakbayan.

Ilang  gitino  nga  misubay  sa lagda ang 104 ka mga retailer ug upat ka mga dealer ug manufacturer ilabi na   sa pabuto.

Lakip sa gisusi sa inspection team ang  mga  pabrika  kung wala ba kini magpatrabaho og mga menor de edad nga gidili sa balaod sa maong matang sa negosyo.

Subay niini giawhag ni Lawas ang mga ginikanan nga monitoron gyud nila ang ilang mga  anak  aron  makalatas pa kini  niining  tuiga 2014  nga way kadaot  ang  lawas  ug  kinabuhi. (BANAT NEWS)