Motor vs van sa transcentral highway usa ang patay

CEBU, Philippines - Patay ang usa ka lalaki nga nagmaneho sa motor ug angol ang iyang angkas human kini nabangga sa usa ka van sa Transcentral Highway sa barangay Prenza sa lungsod sa Balamban sa alas 6:00 sa miaging gabii. 

Ang namatay naila nga si Marvin Lapinid Carillo, 18, samtang ang angol naila nga si Junnel Laborte, pulos molupyo sa sitio Lingatong barangay Vito sa lungsod sa Balamban.

Base sa imbestigasyon sa kapolisan sa lungsod sa Balamban nga ang nakalas mao ang nagdrayeb sa motor nga walay plate number ug matud pa nga nakiglumba kini sa usa ka motor.

Dihang naabot sa barangay Prenza misulay kini og overtake sa usa ka sakyanan apan nawad-an kini og control.

Nasarasay ang motor nga gimaneho ni Carillo ug nabangga kini sa atubangang bahin sa van nga gikasugat niini sa pikas nga lane.

Ang maong van gimaneho ni Wendell Cortes Gilamon, 43, molupyo sa barangay Baliwagan sa lungsod sa Balamban.

Matud pa nga sa pagkakusog sa impact sa pagkabangga sa motor ngadto sa van nakaangkon ang duha og grabing kadaot sa ilang lawas. Daling gidala ang duha ngadto sa Balamban District Hospital apan gideklarar na nga dead on arrival si Carillo.

Gidala sa Balamban Police Station ang duha ka mga sakyanan nga nalambigit sa maong disgrasya.  (BANAT NEWS)