Lima nag-New Year sa prisohan tungod sa drugas
CEBU, Philippines - Sa prisohan gisugat sa lima ka lalaki ang Bag-ong Tuig human sila nangadakpan sa kapolisan sa dakbayan sa Sugbo human sa buy bust operation sa sitio Zapatera sa Bario Luz, sa dakbayan sa Sugbo sa alas 12:30 sa tungang gabii.
Ang nasikop naila nga sila si Alfredo Gegrimosa Jr, 32, Lito Ventura, 36, Victory Paul Sanchez, 2, Edison Pamati-an, 40, molupyo sa Bario Luz, ug si Alberto Villaflores, 42, molupyo sa Kamagong, Lahug.
Nasikop ang lima sa mga sakop sa City Intelligence Branch ug sa City Anti Illegal Drugs Special Operations Task Group sa Cebu City Police Office.
Matud pa nga tumong sa maong buy bust ang usa ka alyas Kulot nga gikatahong namaligya og illegal nga drugas sa maong dapit. Dihang positibo nga mibaligya si Gegrimosa sa usa ka police poseur buyer daling gisikop kini sa kapolisan.
Nakuha gikan kang Gegrimosa ang usa ka medium size nga plastic sa shabu, 49 ka gamay nga pakete, upat ka dakong putos sa shabu, P2500 nga buy bust money, ug P6 mil nga halin niini.
Atol sa maong buy bust operation nasikop sab sila si Ventura, Sanchez, Pamati-an, ug si Villaflores nga naaktohan nga naghupot sa tulo ka linikit nga foil ug mga improvised tooter, usa ka water pipe tooter, usa ka aluminum foil nga gihimong funnel, ug duha ka disposable lighter.
Nakuha gikan kang Ventura ang usa ka .357 paltik revolver nga may lima ka bala. Ang lima kasamtangang natanggong karon sa karsel sa Cebu City Police Office samtang giandam ang kaso alang kanila.
Si Gegrimosa mag-atubang sa kasong kalapasan sa Sec 5 ug Sec 11, Art 2 sa RA 9165 samtang ang upat mag-atubang og kalapasan sa Sec 12 sa samang balaod ug si Ventura mag-atubang sa dugang kaso nga illegal possession of firearms. (BANAT NEWS)
- Latest
