Nasakmita’g 3 ka linikit marijuana priso
CEBU, Philippines - Nagtingkagol sa Talisay City detention cell ang usa ka lalaking nagmaneho og motorsiklo nga walay lisensiya human kini maimbargohi sa kapolisan og mga linikit nga marijuana niadtong Biyernes sa gabii didto sa Cebu South Coastal Road habig sa barangay Linao, dakbayan sa Talisay.
Ang suspetsado mao si John Jade Obeso, 21, taga barangay Tubod, lungsod sa Minglanilla.
Sila si SPO2 Arlan Carillo ug PO1 James Cabrillos kinsa nagpahigayon og aggressive patrolling sa kadalanan sa siyudad maoy nakasikop sa suspetsado.
Base sa talaan sa kapolisan giingong si Obeso nagmaneho og kolor puwa nga Honda XRM nga motor nga walay plaka, hinungdan gipahunong kini sa nahisgutang mga polis.
Apan giingong si Obeso wala makapresenta og mga dokumento sa motorsiklo nga gimaneho niini ug wala usab kini lisensiya nga nagmaneho sa maong sakyanan.
Dihang gipaubos sa body search sa mga polis, nasakpan ang tulo ka linikit nga marijuana nga giluklok sa bulsa sa likod nga bahin sa iyang gisul-ob nga boxer short.
Si Obeso giisyuhan og Temporary Operator’s Permit (TOP) apan mag-atubang siya og kasong paghupot og ginadiling drugas.
Gituohan nga mosugat siya sa bag-ong tuig sa prisohan sa Talisay police. (/WC)(BANAT NEWS)
- Latest
- Trending
