Pagtulun-an ug mithi ni Dr. Rizal kinahanglang magpadayon— Rama

CEBU, Philippines - Si Mayor Michael Rama mibatbat sa mga mithi ug pagtulon-an ni Dr. Jose Rizal ug miawhag sa katawhan nga mosubay kini sa tul-id nga dalan sa kinabuhi ilabi na sa mga kawani sa kagamhanan nga molikay pagpangawkaw sa kwarta sa katawhan.

Ang mensahe ni Mayor Rama iyang giluwatan atul nga siya namulong sa ika-117 nga sumad sa pagkamatay ni Dr. Rizal kagahapon nga gihimo sa kilid nga bahin sa Cebu City Hall diin mahimutang ang monumento sa nasudnong bayani.

Si Dr. Rizal gipatay sa mga sundalo’ng Kastila kaniadtong Disyembre 30, 1896 pinaagi sa pagpusil kaniya didto sa dapit nga nahimutangan sa iyang monumento sa Luneta Park.

Matud ni Rama nga ang katawhan mahimong mosundog sa mga mithi ni Dr. Rizal pinaagi sa pagpakita sa iyang kamatinud-anon sa pagbayad sa tukmang buhis ngadto sa kagamhanan.

Si Rama mipahinumdom usab sa mga polis, mga tanod nga moserbisyo nga dili magdepende lang kun kinsa ang mohatag kanila og mga pabor. “Dili kay kadto ra nga makahatag kaninyo og allowance maoy inyong patrolyahan,” ni Rama pa.

Ang mga kawani sa City Hall gipahinumdoman usab ni Mayor Rama nga moserbisyo nga dili magmugtok ang panagway kun moabi-abi sa mga tawo nga modangop kanila.

Gipasumbingayan ni Rama ang mga kawani sa City Hall nga adunay uban kanila nga mongisi lang kun adunay motunol kanila og kwarta pinaagi sa “under the table.”

Sa iyang bahin, si Vice Mayor Edgardo Labella miingon nga sigurado siya nga daghan sa katawhan ang nakalimot na sa mga mithi ni Dr. Rizal mao nga misiaw na ang pagpangawkaw sa mga kawani sa kagamhanan.

Gihandom gani ni Labella ang usa sa mga sinuwat nga balak ni Rizal nga nag-ulohan Me Ultimo Adios. Pipila ka linya sa mao nga Kinatsila nga balak gibuhat ni Labella sa Binisaya ug nagkanayon.

“Ako mamatay sa labing mangitngit nga dapit sa kagabhion nga mao ang kaadlawon, ug inig-abot nianang taknaa kun wala na ako ug kuwang ang iyang kahayag kawta ang akong lubong ug ti-tia ang katapusang tinulo sa akong dugo ug ang iyang kapula idugang sa pagtina sa luspad nga banag-banag sa kabuntagon sa kagawasan kanato’ng katawhan sa Pilipinas.” (/EIM)(BANAT NEWS)