Nangabubho, bilahan gisunog

CEBU, Philippines - Usa ka ginang nga giingong nangabubho kay wala na ulia sa iyang bana ang nalandig sa tambalanan human iyang gisunog ang iyang kinatawo.

Ang maong ginang residente sa usa sa mga barangay sa lungsod sa Liloan ug gikatahong kasamtangang giatiman sa Vicente Sotto Memorial Medical Center tungod sa grabeng paso nga naangkon sa iyang bilahan.

Si PO3 Jesson Gayo sa kapolisan sa maong lungsod nga nahinabi sa Banat News miingon nga wala matala sa ilang blotter ang maong hitabo.

Apan nakadawat sila og report nga ang mga paryente sa biktima maoy dali nga midala sa ginang ngadto sa tambalanan.

Matud pa ni Gayo, subay sa impormasyong ilang nadawat, ang inahan sa 30 -anyos nga ginang nakamatikod niadtong miaging adlaw nga ang iyang anak ug ang bana niini nag-away.

Gitug-an sa inahan nga ang pangabubho maoy nag-unang hinungdan sa panag-away sa magtiayon kay gidudahang dunay gikabuangan nga laing babaye ang bana hinungdan nga kanunay kining madugay sa pag-uli gikan sa iyang trabaho.

Matud pa ni Gayo ang inahan nahingangha na lamang sila dihang kalit lang misilaob ang bilahan sa anak  hinungdan nga dali kini nilang gitabang ug gihatod sa tambalanan sa dakbayan sa Sugbo.

Wala pa hinuon matataw kun unsay gigamit sa maong ginang  pagduslit sa bilahan nga maoy hinungdan sa kalit nga pagsilaob niini.

Ang maong ginang nga giingon nga nakabaton og 3rd degree burn nga mga paso sa iyang bilahan ang padayon pa karon nga giatiman sa mga doktor sa nahisgotang tambalanan. Ang Banat News misuway pagkuha og dugang impormasyon bahin sa maong kaso diha sa VSMMC apan tungod sa hospital policy walay gusto mohatag niini. (/EIM)(BANAT NEWS)