Kawatan nasikop sa polis nga iyang gikawatan

CEBU, Philippines - Nasikop sa usa ka polis ang usa ka lalaki nga nasakpan  sa akto nga mikawat sa iyang cell phone  sulod sa iyang balay  didto  sa sitio Bonbonan sa Barangay Labangon sa dakbayan sa Sugbo pasado alas 3:00  sa miaging  kaadlawon.

Ang nasikop naila nga si Junnel Bustamante, 18, molupyo sa sitio Sto. Niño sa Barangay Labangon sa dakbayan sa Sugbo.

Samtang ang nakasikop kaniya naila nga si PO2 Ador Bacalso sa kapolisan  sa dakbayan  sa Sugbo.

Matud pa nga ang maong suspetsado misulod sa balay sa biktima agi sa bintana ug mikuha sa Cherry Mobile nga cell phone sa polis.

Apan walay swerti ang maong kawatan tungod kay nakabantay ang  biktima hinungdan sa pagkasikop niini.

Kasamtangang natanggong ang suspetsado sa karsel sa Punta Prinsesa Police Station. 

Samtang dul-an sa P70 mil ang nakuha sa wa pa mailhing tulisan human niini tulisa ang usa ka babaye  sulod  sa iyang  sakyanan sa parking lot sa Cebu Business Park pasado alas 9:00 sa miaging gabii.

Ang biktima naila nga si Josefina Precillas Mauro, 45, molupyo sa Lipata,  lungsod sa Minglanilla.

Samtang ang suspetsado gihulagway nga nagsul-ob og pula nga t-shirt, daot, ug may gitas-on nga 4’10”.

Matud pa nga ang suspetsado nakasulod sa Toyota Fortuner sa biktima.

Dihang nahiabot  na  ang  biktima , misulod  kini  sa  iyang  sakyanan ug  sa  paglingkod  sa driver’s seat, kalit  kining giliab ug gituok sa suspetsado ug mideklarar nga hold-up.

Matud pa nga gikuha sa suspetado ang bag sa biktima nga may sulod nga papeles, passport, credit card, ATM card, duha ka cell phone nga mobalor og kapin sa P10 mil, ug salapi nga P59 mil.

Unya  gimandoan  niini  ang  biktima nga padaganon ang iyang sakyanan apan  kalit  nga miambak sa sakyanan  ang  biktima   ug mitawag og tabang.

Dali usab nga misibat ang biktima nga wala gyud madakpi sa mga gwardiya sa maong dapit. (BANAT NEWS)