Drug pusher gipatay sa polis

CEBU, Philippines - Patay ang usa ka drug pusher nga mipusil sa usa ka polis atol sa buy bust operation nga gipahigayon sa Provincial Intelligence Branch sa Cebu Provincial Police Office  didto sa sitio San Antonio, Barangay Jubay sa lungsod sa Liloan sa alas 10:00 sa miaging gabii.

Ang namatay giila sa kapolisan nga si Elias Gulane, 41, molupyo sa samang lugar, samtang ang nakapusil kaniya naila nga si PO2 Gabriel Opoc sa PIB.

Matud pa nga atol sa maong buy bust operation sa PIB si  PO2 Opoc maoy miduol kang Gulane aron mopalit og shabu gamit ang P1,000 nga marked money.

Apan dihang nakabantay ang suspetsado nga polis ang mipalit kaniya, gipusil niya kini gamit ang .38 nga revolver ug naigo ang tuong kumagko sa kamot sa polis.

Bisan samdan mibalos og pusil ang polis ngadto sa suspetsado ug  gipaarakan  sa mga  bala  niini  ang  lawas.

Matud pa ni SPO1 Francis Villamor ang team leader sa maong operasyon nga gipanid-an na nila ang suspetsado sulod sa tulo ka semana.

Miingon  si  Villamor  nga  nangandam  na  nga daan  ang  suspek  kay  nagkupot  man kini   og  armas  sa  pag-abot  nila.

Daling gidala sa Eversely Child Sanitarium  hospital sa Barangay Jagobiao sa dakbayan sa Mandaue ang maong suspetsado apan gideklarar  kini nga patay na  sa pag-abot  didto.

Samtang si Opoc gidala usab ngadto  sa Perpetual Succour Hospital sa dakbayan sa Sugbo.

Nakuha  sa kapolisan sa  maong operasyon ang duha ka dagkong pakete sa shabu ug usa ka medium nga pakete nga mobalor og P50 mil, mga drug paraphernalia, .38 nga revolver nga may duha ka bala sa tamborong niini, usa ka .9mm nga pistola nga may lima ka bala, .357 nga revolver nga may tulo ka bala ug salapi nga P1,750 nga gituohang halin sa illegal nga druga. 

Gidala na kining  tanan ngadto sa Philippine National Police Crime Laboratory-7 sa Camp Sotero Cabahug sa dakbayan sa Sugbo alang sa chemical analysis.

Ang maong suspetsado matud pa ni Villamor giisip nga level 2 drug pusher nga makadispatsar og 50 gramos nga shabu matag semana ug naglihok ang biktima lakip na sa mga silingang lungsod sa Liloan. (BANAT NEWS)