1 gipusil angol, 1 naghikog sa Pasko

CEBU, Philippines - Patay na nga napalgan sa mga kabanay ang usa ka lalaki nga naghikog sa punoan sa Sambag didto sa Sitio Santo Cristo Brgy. Marigondon  sa pagsugat  sa Pasko.

Samtang kritikal ang kondisyon sa usa ka lakaki  nga gipusil sa usa ka tawo didto sa Sitio Ibabao Brgy. Mactan dakbayan sa Lapu-Lapu sa  mao gihapong  higayon.

Ang  napusilan   mao  si  Arestives Abrasaldo Villarojo, 19, ulitawo, lumad sa Kabanlutan, Bais City Negros Oriental apan temporaryong nagpuyo sa maong  dapit diin nagtrabaho kini isip construction worker.

Sa imbestigasyon ni SPO1 Manolito Abellanosa nasuta nga  nakig-inom  pa sa  silingan nga balay si Villarojo samtang nagpaabot sa pagsugat sa Pasko.

Pipila ka gutlo mibarog kini kay mitubag  sa sugo sa lawas apan sa paggawas niini sa CR usa ka sipang buto ang nabati sa iyang mga kaubanan sa inom ug sa pagsusi niini nagbuy-od na kini nga samaran.

Gidali kini  ngadto sa tambalanan sa Vicente Sotto Memorial Medical Center   samtang gisusi pa sa kapolisan ang responsabli sa pagpamusil.

Samtang  si Rome Romualdo Patigdas, 45, minyo, nga lumad sa Sitio Santo Cristo, Brgy. Marigondon dakbayan sa Lapu-Lapu napalgan  nga nagbitay sa punoan sa Sambag sa maong dapit nga wala nay kinabuhi.

Matud pa ni Dante Dejos ig-agaw sa biktima nga dako ang iyang kakugang sa dihang iyang nakita ang ig-agaw niini nga nagbitay sa kahoy  nga  migamit  og   nylon nga pisi gihikot sa liog  samtang  ang  pikas  tumoy  niini  gigaid  sa sanga  sa Sambag.

Hangtod ning pagsuwat sa balita wala pa masayri kung unsay hinungdan sa iyang pagpakamatay.  (BANAT NEWS)