Ordinansa sa konseho sa Talisay gi-vetohan sa mayor
CEBU, Philippines - Wa pirmahi ni Mayor Johnny De los Reyes ang Appropriation Ordinance nga gipasar sa konseho sa dakbayan sa Talisay. Niadtong Disyembre 26, 2013 ang mayor mi-veto sa Section 5 sa 5th SP Appropriation Ordinance No. 2013-03.
Ang Section 5 sa nahisgutang ordinansa nagmando nga matag konsehal sa dakbayan may katungod nga mopatrabaho og 50 ka mga Job Order (JO), 100 ka JO ang sa bise mayor ug tag-tulo ka JO sa matag usa ka kapitan sa barangay.
Gani may 28 ka JO nga dili magtutudlo ang gigahin alang sa Talisay City College.
Matud sa mayor nga wala siya makauyon niining quota sa JO sa matag opisyal kay naghinubra na ang gidaghanon sa maong mga trabahante karon.
Dili pa dugay, gihimo na lang 20 ka JO ang gi-quota sa matag konsehal gikan sa 50. Apan makapasubo kay sila si Konsehal Eduardo “Digul†Gullas III ug si ex-officio member Raul Cabañero gihatagan lang og quota nga tag-lima ka JO ang matag usa kanila. Gibutyag ni Fernandez nga igo lang silang mipahinumdum sa saad sa mayor nga hatagan sila og quota nga tag-50 ka JO matag usa kanila sa wala pa aprobahi ang annual budget sa tuig 2014
Matud usab ni Fernandez nga si City Budget Officer Edgar Mabunay ug City Accountant Viluzminda Villarante pulos mikompirmar nga ang siyudad may igong budget alang sa tag- 50 ka JO matag konsehal.
Si Bise Mayor Romeo Villarante sa iyang bahin nagkanayon nga posibleng magtigom ang mga sakop sa konseho ug hisgutan nila ang kabahin sa ilang lakang sa pag-veto sa mayor sa ordinansa. (BANAT NEWS)
- Latest
