Unang sesyon sa konseho sa Talisay sa 2014 huboan sa komitiba si Basillote
CEBU, Philippines - Gitino sa mayoriya nga sakop sa konseho sa syudad sa Talisay nga sakop sa ALAYON party nga ilang hukasan og komitiba ang ilang kauban nga si Konsehal Dennis Basillote unya sa unang sesyon sa konseho sa Enero sa sunod tuig.
Kini tungod sa pagtapon na niini gikan sa ALAYON party ngadto na sa Liberal Party nga gipangulohan ni Mayor Johny Delos Reyes.
Sigun pa ni Konsehal Richard Francis Aznar nga mao ang majority floor leader sa konseho nga langkatan si Basillote sa iyang pagka- assistant majority floor leader inighurar niini sa LP.
Gitakda nga mohurar si Basillote sa LP sa unang sesyon sa konseho sa Enero sa tuig 2014 ug dihadiha langkaton kaniya ang iyang mga komitiba nga gihuptan karon.
Gikonpirmar ni Aznar nga posibli nga ang mga komitiba ni Basillote adto mapunta sa kanhi mayor sa Talisay nga karon si Konsehal Socrates Fernandez. Ang partido Alayon nagpabiling gipangulohan ni kanhi kongresista Eduardo Gullas. (BANAT NEWS)
- Latest
