Karaang merkado sa Mandaue ayuhon

CEBU, Philippines - Ang pagtukod  og  balik sa merkado publiko sa likod  sa National Shrine of Saint Joseph sa barangay Centro sa dakbayan sa Mandaue  giplano   karon sa kagamhanan sa maong dakbayan.

Kini ang nasayran sa Banat News gikan  kang Roger Paller nga maoy tigpamaba sa kagamhanan sa maong dakbayan  kagahapon.

Matud pa niya nga si Mayor Jonas Cortes   mihiklin na sa unang plano nga pagtukod og government center sa luna sa karaang merkado.

Kini  tungod  kay  naglaraw  ang  mayor  nga tukoron pag-usab  ang  bag-ong  merkado sa maong  luna  nga  gitarokan  kaniadto  sa karaang merkado.

Dugang pa ni Paller nga ang merkado sa luyo sa Mandaue City Cultural and Sports Complex ilang nahunahunaan nga  ipaguba sanglit nakasinati man kini og grabeng kadaut  atol sa  7.2 magnitude nga linog.

Atol  sa maong  katalagman  nakalas    ang  usa  ka vendor  sa merkado.

Si Paller  miingon nga ang maong  merkado  karon  likod  sa sports complex  maoy  himoong  city  hall  sa Mandaue. Midugang  si Paller nga ang karaang city hall sa barangay Centro  himoong  museum  sa kagamhanan  sa dakbayan.  (BANAT NEWS)