Tanang karsada sa Lapu-Lapu ipaayo sa 2014

CEBU, Philippines - Hatagan  og  unang  pagtagad    ni  Mayor  Paz Radaza  ang  pagpaayo  sa tanang  karsada  sa dakbayan  sa  Lapu-Lapu sa unang bulan sa  2014.

Kini gipadayag ni Mayor Radaza sa iyang pagpamulong   atol  sa  pagpang-apud-apod sa  hinabang   salapi  ngadto sa mga senior citizen   sa  miaging adlaw.  Matud pa niya   nga  may  lista  na  siya  sa mga nag-unang kadalanan sa dakbayan nga unahon  pag-ayo.

Giawhag  usab  niya   ang mga kapitan sa barangay sa pagtuman sa ilang kaakohan ngadto sa mga molupyo nga nagpili kanila sa katungdanan alang sa kalamboan ug kaayohan sa kinabag-an.

Sa nasayran nga si Kapitan Jose Dungog  sa Gun-ob  nga kanhi bise presidente sa Liga ng Mga Barangay sa maong dakbayan  maoy mihulip isip presidente  sa Association  of Barangay Council (ABC) kang  Konsehal Leo Mercado  sa dakbayan  nga  napili sa piniliay niadtong Mayo niining tuiga.

Gitunol ni Mayor Radaza ang P1,500 ngadto sa 16,324 ka mga senior citizen sa dakbayan alang  sa tuig 2013.

Dugang nakadawat og pinansiyal nga hinabang nga P1,000  mao usab ang mga person with disabilities (PWD) gikan sa 30 ka barangay sa maong dakbayan nga mikabat  sa 1,165 ang gidaghanon.

Kahinumdoman   nga  nahukman  sa kagamhanan  sa maong  syudad  ang pagkanselar sa Christmas party sa mga kawani apan ilang gipadayon ang tinuig nga Christmas party sa mga bata nga anak sa kabus nga ginikanan sa maong dakbayan. (BANAT NEWS)