2 naghupot og shabu tiklo

CEBU, Philippines - Gibalhog sa prisohan sa Consolacion Police Station ang duha ka tawo nga nasikop kay naghupot og shabu sa barangay Tayud, lungsod sa Consolacion  sa miaging gabii.

Ang  mga suspetsado mao sila si Benjie  Anoos  Maquilan, 37, minyo,  nga nagpuyo sa barangay Tayud sa nahisgotang lungsod ug Antonio Loon Ancero, 35, minyo, lumad nga taga Bagong Bayan sa Cataingan, Masbate ug kasamtangan nga nagpuyo sa maong dapit.

Si PO3 Socrates Borinaga sa kapolisan  sa maong lungsod nga nahinabi sa Banat News miingon nga nakadawat sila og taho gikan sa nagpakabana nga molupyo  kalabot sa illegal nga kalihokan ni Ancero sa nahisgotang dapit.

Kini ang hinungdan nga naghimo sila og buy bust operation pinaagi sa pagpakaaron-ingnon sa ilang kauban nga mopalit og shabu ngadto kang Ancero.

Matud pa ni PO3 Socrates nga samtang  mipalit  og  shabu  ang  ilang  police decoy,  nagpahipi  usab  ang  ubang  mga  polis   sa hilit nga bahin sa maong dapit.

Dugang pa ni PO3 Borinaga nga sa  pagtunol ni Ancero   sa duha ka pakete nga shabu ngadto sa ilang kaubang  police decoy, gitunol usab niini  ang  bayad  nga  P200 nga marked  money.

Si PO3 Borinaga miingon  nga dihang gidawat sa maong suspetsado ang kuwarta,  ila  dayon  kining gihamagan   ug dayong signit kang Ancero nga naghupot pa sa salapi  nga  gibayad   sa  police  decoy.

Samtang gisignit nila si Ancero kalit usab nga migawas sa balay si Maquilan ug mikaratil og dagan pahilayo apan gisugat kini sa uban pa nga mga polis nga naglibot na sa maong dapit.

Matud pa ni PO3 Borinaga nga gawas sa duha ka pakete nga shabu nga nakuha kang Ancero nasakmitan  usab kini og lain pang walo ka pakete, walo ka tin foil, P200 nga marked money ug P600,000 nga gituohang halin  niini  sa  shabu. Samtang si Maquilan nga gituohang didto sa sulod sa  balay ni Ancero nakuhaan usab  og tulo ka paketeng shabu ug tin foil ug ingon man disposable lighter nga nalakip usab sa mga ebidensiya.

Si PO3 Borinaga miingon nga ilang pasakaan  og   kaso nga kalapasan sa Republic Act 9165 kon Comprehensive Dangerous Drug Act of 2002.

Gituohan  nga  adto  magsaulog  sa Pasko  ug  Bag-ong  Tuig   ang duha ka dinakpan  sa sulod sa prisohan  sa kapolisan. (BANAT NEWS)