2 ka bay ugdaw sa sunog sa Mambaling
CEBU, Philippines - Duha ka balay ang naugdaw sa sunog nga miigo sa sitio Bayabas sa barangay Mambaling pasado alas 8 sa miaging gabii.
Matud pa ni SFO1 Lowel Opolentisima sa Cebu City Fire Station nga ang sunog nagsugod sa balay ni Epifanio Gerado ug mitapon usab kini sa balay ni Eugenio Alegre Jr. ug mikabat sa 25 minutos dihang nakontrolar ang kayo.
Nakadawat og alarma ang kabomberohan sa alas 8:43 sa gabii ug midiritso dayon sila sa lugar nga nasunogan.
Gibana-bana nga mokabat og P200 mil ang danyos sa maong sunog matud pa ni Opolentisima nga nahinabi sa mga tigbalita.
Si George Gerado, anak ni Epifanio nga nahinabi sa Banat News miingon nga mi-spark ang circuit breaker sa ilang balay ug iya lang kini nga gibalik og on.
Apan iyang giklaro nga usa lamang ka series light ang iyang gipasiga sa ilang balay ug may 20 anyos na nga wala masusi ang koneksyon sa ilang kuryenti.
Apan pipila ka minuto misiga na ang ibabaw nga bahin sa ilang balay hinungdan nga nagdinaganay na lang sila.
Samtang si Alegre, usa sa mga nasunogan nagkanayon nga kun wala pa masunog ang ilang balay mag-party unta sila sa kauban niyang mga drayber sa jeep.
Midugang si Alegre nga ikaduha na nga higayon nga siya nasunogan, una niadtong 2006 sa Basak- Pardo ug kay wala na man sila kabalik ngadto, didto na sila nipuyo sa sitio Bayabas sa barangay Mambaling.
Dihang gipangutana kun magselebrar pa ba kini sa Pasko igo lang siyang mitubag nga, “wala nay Pasko ug Bag-ong Tuig.â€
Ang asawa ni Alegre nga si Maria Alegre, mibutyag sa Banat News nga wala hinoon siya ma-rattle apan mikaratil siya og dagan tungod kay naanad na siya sa sunog.
Apan wala gyud siya’y napunit gawas lang sa iyang gigakos nga imahen sa Birhen sa Regla nga gisulod niini sa sako. (BANAT NEWS)
- Latest
