Sikyu gitabangan og kulata una gipusil

CEBU, Philippines - Gipasakaan og kasong murder kagahapong adlawa ang duha ka mga sikyu diin ang usa niini nakapusil patay sa laing sikyu nga si Warlito Astacan sa Deca Homes sa barangay Dumlog sa dakbayan sa Talisay sa miaging gabii.

Si Insp. Rodgene Fudotan nga nahinabi sa Banat News miingon nga base sa imbestigasyon migawas nga sukwahi ang mga pamahayag sa duha ka suspek nga sila si Reynante Flores ug Jason Bisangcay sa tinud-anay nga nahitabo.

Sumala pa ni Insp. Fudotan nga imposible alang sa usa ka security guard nga moadto sa ngitngit nga siya rang usa ug magdala lang og kabilya.

Si Astacan gipasanginlan sa duha nga misulong sa ilang pwesto ug gihapsan sila niini og kabilya ug duna kini kaubang upat ka tawo ug gibaharan silang pamatyon maong ilaha kining gi-shotgun.

Nasuta sab sa autopsy matud pa ni Insp. Fudotan nga dunay nakit-ang mga bun-og sa lawas sa biktima, timailhan nga gikulata kini.

Nakakuha sab og dugang ebidensya ang kapolisan sa cellphone sa biktima nga dunay tawong mitawag niini nga daw gihulog siya sa laang.

Gawas pa usab niini nakabasa sab ang kapolisan og text gikan sa celfon sa biktima nga nangayo siya og tabang tungod kay naay mga tawo nga naghapa-hapa nga naa sa ngitngit.

Nasuta sab sa imbestigasyon nga gawas sa duha ka gwardya duna pay laing tawo nga didto sa maong lugar.

Nagtuo ang kapolisan nga ang motibo sa pagpatay may kalambigitan gyud sa pagdis-arma ni Astacan sa kaubang mga gwardiya sa mga suspek  nga nagmaoy ug nagpabuto og armas sud sa pareho nilang gibantayang subdivision.

Matud pa ni Insp. Fudotan nga kun mailhan na nila kun kinsa ang maong mga tawo i-apil sab nila kini sa pagpasaka og kasong murder.

Susihon sa Firearms Explosives Security Service Agency and Guards Supervisory Section (FESSAGS) kun duna bay lisensya ang shotgun nga gigamit ni Flores, sumala pa ni Sr. Supt. Marvin Sanchez.

Matud pa ni Sanchez nga naghulat na lang siya sa report sa kapolisan sa dakbayan sa Talisay sa maong hitabo. (BANAT NEWS)