Las Vegas KTV buksan di madugay?

CEBU, Philippines - Dili imposible nga pabuksan ra gihapon pagbalik ni Mayor Michael Rama ang gipatak-opan niya nga Las Vegas KTV sa Barangay Mabolo.

  Ang tsirman sa City Anti-Indecency Board (CAIB) nga si Dra. Lucille Mercado miingon nga base sa City Ordinance 1408 ang mga balay-patigayon nga masirad-an sa pagpasundayag og law-ay nga talan-awon dili mabuksan sulod sa usa ka tuig.

 Apan dihang gi-interview sa mga reporter si Mayor Rama iyang gibutyag nga adunay mga higayon nga hatagan og pasaylo ang mga hingtungdang balay-patigayon.

 Gihimo nga sanglitanan sa mayor ang mga binilanggo nga bisan og gikonbikto sa mga hukmanan sa ilang paghimo og salaud apan pabuhian gihapon sila sa presidente pinaagi sa paghatag og Executive Clemency kon pardon.

 Ang Las Vegas KTV gipatak-opan kaniadtong Biyernes tungod kay nasakpan sa mga tigpaniid sa CAIB nga magpasundayag kini og mga babaye nga maghukas sa ilang sinena atubangan sa mga kustomer. Ang gipasirad-an nga KTV bar giingon nga maoy hugopanan sa mga ilado nga tawo sa dakbayan sanglit ang mga entertainer niini  “mamords” kaayo nga mga batan-ong babaye.  (Rene U. Borromeo/WC)

Babaye  giluthang  samdan sa wa ilhi

Samdan  ang usa ka babaye human   pusila sa duha ka wa pa ilhing lalaki  sulod  sa iyang  tindahan sa sitio Maximina, barangay Poblacion 1,dakbayan sa Carcar alas 11:56   sa  miaging  gabii.

Ang biktima naila nga si Estela Lazaga, 74, minyo, molupyo sa naasoy’ng lugar.

Base sa imbistigasyon   nasuta  nila ni PO3 Jerson Antiampo, PO1 Jennis Lamosao, PO1 Jomar Gonzalo, PO1 Jovanie Abellaneda ug PO1 Nelson Alico sa Carcar Police Station nga ang biktima natulog uban  sa iyang  bana  sa  sulod  sa  ilang tindahan.

Apan  napugos  ang  biktima  sa pagpangabli    kay may nanangpit  nga  mopalit  og  sigarilyo.

Apan  sa  iyang  pag-abli  sa sira  sa pultahan  sa iyang tindahan, gisugat siya  sa  mga  bala  sa armas  sa kriminal.

Human matumba sa sawog  ang  biktima, dali  kaayong  nakalayas  ang  mga  kriminal sakay  sa ilang motorsiklo.

Nakaangkon ang biktima og samad-pinusilan sa iyang dughan hinungdan nga gidala kini sa Carcar Provincial Hospital apan gibalhin kini sa Vicente Sotto Medical Center.

Si SPO1 Randy Chavez nahinabi sa Banat News miingon nga wala pa sila’y lead sa mga suspetsado ug padayon pang gisuta sa kapolisan ang motibo sa maong pagpamusil. (BANAT NEWS)