Kolektor sa masiao nasakmita’g shabu

CEBU, Philippines - Nasakmitan og shabu ang  usa ka tawo nga kolektor sa  masiao didto sa  Canduman Housing sa barangay Canduman sa dakbayan sa Mandaue alas 10:00 pasado sa miaging buntag .

Si PO1 Richard Pogoy sa kapolisan sa maong lungsod miila sa suspetsado nga  si Oliver Morales Arda alyas “Gaga” 37,   taga purok Nangka sa barangay Tulotulo, sa lungsod sa Consolacion.

Matud pa ni PO1 Pogoy nga sayo  niini, nakadawat  sila  og taho  nga  may tawong  namaligya  og tip sheets   sa illegal numbers game  nga    didto sa nahisgotang lugar.

Busa  nakaaghat   si  Chief Inspector Marlon Gumabao sa  pagsusi   niini  uban  nila  ni  PO3 Bler Pastor, PO2 Keneth Perotchu ug PO1 Ryan  Diamada.

Apan  matud  pa ni PO1 Pogoy  nga dihang   didto na  sila   sa maong dapit  naabtan nila ang maong suspetsado.

Diha-diha  ilang girikisa ang bulsa  niini ug  nakuha nila  ang usa ka paketeng shabu   busa  ila  kining  gisakmit.

Gawas  sa shabu  nasakmit  usab  nila  ang lima ka masiao tip sheets, upat ka tally sheets nga adunay gisulat nga kombinasyon sa numero sa masiao. Si PO1 Pogoy miingon nga ang kaso nga kalapasan sa Republik  Act 9165 kon Comprehensive Dangerous  Drug Act of 2001  maoy  ilang  ipasaka  batok  sa suspetsado  kini  nagtingkagol  na  karon  sa prisohan. (BANAT NEWS)