Maestra gidagit sa uyab

CEBU, Philippines - Gialarma sa kapolisan sa  Mandaue City Police Office (MCPO)  ang usa ka babaye nga magtutudlo nga gialigar nga gidagit sa iyang  uyab  ug gihagbong sa sakyanan sa dalan Ouano Avenue sa reclamation area kagahapon  sa hapon.

Si SPO1 Michael Limalima sa kapolisan sa Presinto 2 sa MCPO nga nahinabi sa Banat News mipugong  sa  ngalan  sa maong magtutudlo  sa elementary  sa usa ka pribadong tulunghaan sa dakbayan sa Sugbo.

Matud pa ni SPO1  Limalima nga alas 2:00 pasado ang takna kagahapon  sa hapon  nadawat nila ang maong alarma ug ilang namatikdan ang biktima nga  luya ang lawas  busa gihatud  nila kini  ngadto  sa  pink room sa Vicente Sotto Memorial Medical Center sa dakbayan sa Sugbo.

Dugang pa ni  SPO1 Limalima nga giangkon sa maong babaye nga ang lalaki nga mipugos sa pagpasakay   kaniya sa sakyanan kanhi iya  nga hinigugma apan  wala  na  kini  muhatag  og dugang  detalye. Si SPO1 Limalima miingon nga  tungod kay sa dakbayan sa Sugbo man nagsugod ang maong hitabo  ila  kining  gitugyan  ngadto sa kapolisan sa Presinto 10  sa Cebu City  Police  Office aron  kini  ika-blotter.

 Nagtuo si Limalima  nga wala lamang magkasinabtanay ang biktima ug  ang    hinigugma niini   nga maoy hinungdan nga gihagbong kini sa reclamation area . (BANAT NEWS)