Mananagat hatagan og pumpboat ug pukot

CEBU, Philippines - Mohatag  ang  kagamhanan  og  suporta  sa  mga  mananagat   nga  biktima  sa    bagyong Yolanda  gikan  sa  pinansiyal   ingon  man  sa  mga kahimanan ug alternatibong panginabuhian. Si  6th District Board Member Thadeo Ouano nga maoy chairman sa committee on environment sa hunta probinsiyal  mibutyag  sa  Banat News kagahapon   nga  pangamahanan niya   ang  usa  ka resolusyon  alang  sa maong  katuyoan.

Gitataw ni Ouano nga lakip   nga  ihatag  sa kagamhanan   sa mga mananagat mao ang motor banca, pukot ug dugang  panginabuhi . Si Board Member Ouano mipasabot nga ang paghatag og   sabin-sabin   nga  panginabuhi mahimo nga dumalahon sa asawa sa usa ka mananagat nga maoy  ikabangkilya sa panginabuhi nga pagpanagat sa ilang mga bana.

Naglakip sa alternatibong panginabuhi nga kadangpan nga dumalahon sa asawa mao ang pagpamuhi og hayopan  sama  sa  kanding, baboy o ang pagpaninda  ug uban pa.

Si Ouano miingon nga nakita niya ang maong panginahanglan sa mga mananagat nga  nakasinati sa mibaha  ang  asayte  o  oil spill  sa kadagatan sa Sugbo  gikan  sa barkong  MV  St. Thomas  Aquinas nga nalunod  sa kadagatan  sa Talisay  City  human  dasmagi  sa Sulpicio  Express Siete  niadtong  Septiyembre 16, ning  tuiga. (BANAT NEWS)