Publiko giwarningan bahin sa mini nga tseke sa SSS

CEBU, Philippines - Mipasidaan ang Social Security System (SSS) sa publiko ilabi na sa mga gagmay nga mga establisemento nga magbinantayon sa pagdawat og tseke sa SSS isip bayad sa mga gipamalit nga produkto ug pagpa-ilis sa maong tseke.

Sumala  sa  taho  sa Philippine  Information Agency (PIA) nga gihimo  kini  sa kadagkoan  sa SSS human  makadawat ang SSS La Union Branch Officer-in-Charge Francisco F. Pentecostes og giingong peke nga tseke sa SSS nga gibayad  sa  mga  gipamalit  nga  mga tinda sa  usa ka grocery store nga nagkantidad og P9,000.

Ang maong mga pekeng tseke sa SSS gipagawas sa Land Bank of the Philippines Baguio City Branch, apan ang account diin kini na-withdraw naggikan sa Land Bank of the Philippines Tarlac Branch.

Sumala  sa PIA  nga ang maong tseke nga adunay 2 ka managlahing account number ug ang mga lagda niini dili lagda sa mga otorisadong signatories sa maong ahensya.

Busa  gi-alerto dayon sa SSS La Union Branch ang tanang sakop niini nga lugar tungod sa maong matang sa modus operandi.

Midugang  ang  PIA  nga ang mga authentic SSS nga tseke adunay usa  ka account number lamang nga makita sa ibabaw sa petsa sa tseke apil na usab sa tungang  bahin  niini. 

Gipasabot  sa  PIA  nga lahi  ang peke nga tseke nga adunay 2 ka managlahing account number.

Ang SSS number sa member payee anaa  usab nakabutang  sa tseke.

 Miingon  ang  PIA  nga ang mahinungdanon sa tanan, ang lagda sa SSS president nga mao lamang ang nag-inusarang signatory alang sa tanang benefit checks nga gipagawas sa SSS. (BANAT NEWS)