Pagkaon sa Pasko bantayan–FDA Liezl
CEBU, Philippines - Ang Food and Drugs Administration (FDA) mihimo og pamaagi sa pagpili og pagkaon niining nagsingabot nga pagsaulog sa Pasko ug Bag-ong Tuig.
Sa report sa Philippine Information Agency (PIA) giingong base sa Advisory 2013-064 sa FDA nga gilagdaan ni Acting Director General Kenneth Hartigan-Go,giawhag niini ang tanan nga angay mag-amping sa pag-andam sa pagkaon karong Pasko aron masiguro nga dili madaot sa mga kagawon nga pagkaon.
Dugang pa sa PIA nga mahimong malikayan ang hugaw nga pagkaon kun mag-amping lamang ang matag usa.
Gitambagan usab sa FDA ang publiko nga sigurohon niini nga ang paliton nga isda, karne, utanon ug prutas ikasulod una sa freezer aron nga dili kini daot inigluto. Giawhag nga angay usab ibutang ang mga perishable grocery items buwag sa mga dili dali madaot nga mga butang ug isulod sa mas bugnaw nga lugar.
Ibutang dayon ang mga karne sa freezer aron malikayan ang daling pagkadaot niini ug angay nga likayan nga motulo ang dugo gikan sa karne sa bisan asang parte sa kusina tungod kay dali kining taptan og bacteria.
Angay usab nga hugasan og maayo ang tanang utanon ug prutas tungod kay kasagaran niini binombahan og kemikal, sa dili pa ibutang sa refrigerator aron dili mahimong hinungdan sa kontaminasyon sa uban pang pagkaon.
Siguradohon usab nga manghugas og maayo sa mga kamot gamit ang sabon ug igong tubig sa dili pa mopunit og pagkaon alang sa mga bata ug bantayan ang mga bata sa ilang pagkaon ilabi na kun gikan sila sa pagkupay sa mga binuhing hayop. Angay gayud nga mogamit lamang og mga gamit sa pagpangluto ug serving utensils nga limpyo.
Dugang tambag sa FDA nga ilabay gyud ang tanang sobra nga pagkaon ilabi na kun gikan kini sa party. Kun nagduda sa kaluwasan sa pagkaon, mas maayong ilabay na lamang kini ug dili na ipanghatag o ipakaon pa sa uban bisan sa binuhing iro.
Miingon ang FDA nga mas maayong mokonsulta dayon sa doktor kun nagdudang nataptan og sakit gumikan sa gikaon. (BANAT NEWS)
- Latest
