KTV Bar gi-padlock sa CAIB

CEBU, Philippines - Gipasirad-an kagahapon sa udto sa City Anti Indecency Board (CAIB) ug sa Prevention, Restoration, Order, Beautification and Enhancement (Probe) ang usa ka KTV Bar sa North Reclamation Area tungod sa pagpasundayag niini og hubo-hubo.

Ang gipasirad-an mao ang Las Vegas KTV Bar subay sa kamandoan ni Mayor Michael Rama tungod sa kalapasan niini sa city ordinance 1408 nga nagdili sa mga malaw-ay nga mga pasundayag.

Gipangunahan ni State Prosecutor Aida Sanchez ug sa acting head sa PROBE nga si Racquel Arce ang paghatod sa closure order sa maong KTV Bar kagahapon sa udto.

Apan wala didto ang tag-iya sa maong KTV bar sanglit gabii pa man ang operasyon niini. Human nila ma-serve ang maong order  daling gipasira ug gi-padlock sa CAIB ang maong KTV bar. 

Apan ang abogado sa Las Vegas KTV bar Inocencio dela Cerna miingon nga supak sa balaod ang gihimo sa CAIB.

"The closure is arbitrary and capricious as our client was not given due process. No evidence whatsoever was presented to us regarding the alleged lewd show. In fact there was no hearing conducted for that matter," matud pa ni dela Cerna.

Matud pa ni dela Cerna nga mopasaka sila og motion for reconsideration ug ilang hangyoon ang paglibkas sa closure order sa maong KTV bar.

Ang Las Vegas KTV bar maoy ikaduhang bar nga gipasira sa dakbayan niining tuiga tungod sa malaw-ay nga pasundayag, una nang nasira ang Cheetah nga usa ka gay bar sa barangay Banilad niini gihapong siyudad. (Bryner Diaz ug ni Kristine Quintas sa The Freeman/EIM) 

Gunrunner sa Danao nakaipsot

Nasikop sa mga sakop sa Provincial Intelligence Branch ang duha ka mga lalaki nga naaktuhang naghimo og armas samtang nakaipsot ang lalaki nga giingong tag-iya sa maong payag sa barangay Taboc Camalig Bato sa dakbayan sa Danao pasado alas- 4 sa hapon.

Ang nakaikyas giila nga si Renato Ramoneda, molupyo sa Sitio Lapu-Lapu, Barangay Suba, nga maoy subject sa maong buy bust operation.

Samtang ang nasikop naila nga si Sherwin Manipis Bayo, molupyo sa barangay Suba  ug si Joseph Tobias, molupyo sa Taboc Camalig Bato sa dakbayan sa Danao.

Matud pa nga dihang naabot ang mga polis wala makabantay ang duha nga naghimo pa og armas sulod sa usa ka payag hinungdan nga sila gidakop, apan nakadagan si Ramoneda.

Narekober sa kapolisan ang unom ka kalibre 45 nga pistola, usa ka usa ka .9mm KG9 submachine pistol, ug usa ka .38 nga revolver.

Matud pa sa team leader nga si SPO1 Francis Allen Villamor, nga gitunol ni Ramoneda sa usa ka police poseur buyer ang mga armas nga nagkantidad og P1,500 nga salapi. Gisulayan pa unta sa polis nga mopagawas pa og laing armas si Ramoneda apan nakabantay na kini ug daling misibat.  “Gisige og estorya hangtod niingon nga duna pa, magkuha ta’g lain mao amo gipaabot unya niingon man nga mangihi kadiyot wala na nibalik,” matud pa ni Villamor.

Matud pa nga si Ramoneda ang ikatulo sa nag-unang mga supplier og armas sa listahan sa PIB nga nagsilbing stock broker, financier ug dealer niini.

Samtang ang duha ka lalaki nga naaresto natanggong sa karsel sa kapolisan sa lungsod sa Consolacion ug mag-atubang og kasong kalapasan sa RA 10592 or Comprehensive Firearms and Ammunition Regulation Act lakip na ni Ramoneda. (BANAT NEWS)