Car dealer suspek sa pagpatay

CEBU, Philippines - Pasakaan og kaso sa Special Investigation Task Group of the Cebu Provincial Police Office ang usa ka car dealer may labot sa kamatayon sa duha ka Korean nationals kansang mga patay’ng lawas gisunog sa sud sa usa ka sakyanan diha sa barangay Sabang sa dakbayan sa Danao.

Matud pa nga gilambigit ang maong car dealer sa kamatayon sa duha ka mga Koreano base sa affidavit sa duha ka saksi sa maong krimen.

Nasuta sab sa imbestigasyon nga siya ang kataposang tawo nga nahinabi sa mga biktima sa wala pa sila ma-missing niadtong Nobiyembre 12.

Gi-implementar sa SITG ang usa ka search warrant sa warehouse nga gipanag-iya sa maong car dealer diha sa barangay Pakigne sa lungsod sa Minglanilla sa miaging adlaw nga miresulta sa pagkasikop sa caretaker ug sa pagkarekober sa usa ka Mitsubishi Lancer.

Sumala pa sa mga polis, ang tag-iya sa maong Mitsubishi Lancer nga narekober sa maong bodega, mibutyag nga gihulman kini sa mga biktima aron i-deal apan wala na mabalik. Samtang ang nasunog nga Hyundai Santa Fe diin mapalgi ang mga lawas sa duha ka Koreano nga babaye ug lalaki sa Danao City, gipanag-iya sa usa sa mga saksi apan wala pa ma-transfer sa pangalan sa mipalit kay wala pa kini maimpas og bayad.

Ang SITG nakig-alayon na karon sa PNP Crime Laboratory 7 aron sa pagpangita og dugang ebidensya nga magamit nila batok sa maong car dealer.

Ang duha ka mga saksi pulos car dealers ug ang duha ka biktima maoy middle man sa ilang mga transaksyon.             

Misibaw sab ang pangalan sa maong car dealer  sa imbestigasyon sa SITG nga nalambigit sa pagbaligya og mga surplus nga mga sakyanan ug kini notado na usab sa Highway Patrol Group.

Apan si Sr. Supt. Noel Gillamac, ang Provincial Director sa CPPO, miingon nga iya pang gihuwat ang resulta sa DNA test sa duha ka lawas sa Campo Crame.

“Sa among pag-analyze lang sa kaso nagtuo mi nga these missing Koreans are already dead and possibly the crime scene was inside the warehouse but it’s safe to say its them if we have the results,” matud ni Gillamac. (BANAT NEWS)