25 ka pamilyang nasunogan sa barangay Umapad tabangan
CEBU, Philippines - Gipailawom karon sa state of calamity ni Umapad barangay Kapitan Nelson Rubio ang Purok Limonsito nga naugdaw sa sunog sa miaging semana diin 25 ka pamilya ang nawad-an sa ilang panimalay.
Matud pa ni Rubio nga ilang gipaubos sa state of calamity ug nagamit na ang P50,000 nila nga calamity fund nga gipalit sa dinaliang panginahanglan sa mga nabiktima. Ang City Social Welfare sa Mandaue daan na nga naghatag og hinabang nga pagkaon ngadto sa mga biktima ug giabagan usab kini gikan sa ilang kaugalingong panudlanan.
Ang mga biktima sa maong sunog temporaryo karong nagpuyo sa mga tulda sa barangay ug duna say nagpuyo sa Umapad Elementary School nga gihimong temporaryong evacuation center.
Usa sa giatubang nila karong problema mao ang napulo ka pamilya nga wala na tuguting makatukod pagbalik og balay sa luna nga ilang gipuy-an tungod kay dili na mosugot ang tag-iya niini. (BANAT NEWS)
- Latest
