Lolo sa nag-birthday gidunggab sa anak

CEBU, Philippines - Nagubot ang usa ka birthday party human giunay og dunggab sa usa ka batan-on ang kaugalingon niining amahan diha sa sitio Soong sa barangay Mactan, dakbayan sa Lapulapu alas- 8 pasado ang takna sa miaging gabii. Ang biktima mao si Eric Agosto Tampus , 49, samtang ang suspetsado mao si Marvin  Tampus, 18, amahan sa batang nag-birthday.

Si SPO1 Allan Pantaleon sa kapolisan sa homicide section sa maong dakbayan nga nahinabi sa Banat News miingon nga birthday sa anak sa suspetsado nga apo usab sa biktima niadtong tungora. Apan sa kadugay nila og inom, dunay gikabingkilan ang manag-amahan nga misangpot sa mainiton nilang tinubagay hangtud nga milanit og kutsilyo ang suspek ug gidunggab ang bukobuko sa amahan.

Ang biktima daling gidala sa Lapulapu City Hospital apan human sa pagtambal sa mga doktor gibalhin ngadto sa Vicente Sotto Memorial Medical Center sa dakbayan sa Sugbo.

Padayon pa karong gipangita ang suspek nga daling misibat human sa hitabo. (BANAT NEWS)