Upat mireklamo batok sa water refilling station

CEBU, Philippines - Upat ka mga tawo ang nalandig sa Eversely Child Sanitariun General Hospital sa Jagoabiao sa dakbayan sa Mandaue tungod sa giingong pagsakit sa ilang mga tiyan ug gidudahang gumikan kini sa napalit nilang tubig sa usa ka refilling station.

Ang upat, pulos residente sa barangay Labogon sa dakbayan sa Mandaue mireklamo ngadto sa health office sa maong dakbayan.

Si Roger Amadeo nga maoy tag-iya sa nahisgotang water refilling station nga nahinabi sa TV Patrol Central Visayas  mihimakak sa pasangil ug mipasabot nga sa kadaghan sa iyang kustomer ang mao rang pamilya ang mireklamo nga nadaut.

Siya mirason nga limpiyo ang tubig gikan sa iyang water refilling station apan ang nakadaut lang kay butangan kini og ice water nga ang tubig nga gigamit gikuha lamang sa puso.

Ang  City Health Office sa Mandaue naghimo og pakisusi sa gireklamo nga water refilling station ug nasuta walay kagaw ang tubig nga gibaligya ni Amadeo apan nasuta nga walay kini sanitary permit hinungdan nga temporaryo kini nilang gisuspenso ang operasyon niini.

Si Amadeo sa mao gihapong report miingon nga dili kini mobayad sa nagasto sa mga biktima sa ilang pagpatambal sa hospital kay wala man makapamatuod nga ang gibaligya nilang tubig ang nakaingon sa ilang pagkalibanga.  (BANAT NEWS)