Nagtumod og kopras gitigbas, liog diriyot maputol

CEBU, Philippines - Patay ang usa ka lalaki nga nagtumod og kopras human kini gitigbas sa silingan nga iyang gikabangi sa sitio Papan Public Market sa barangay Papan sa lungsod sa Sibonga sa alas 7:30 kagahapon sa buntag.

Ang biktima naila nga si Antonio Calago Luzon, 51 anyos, molupyo sa barangay Dugo-an sa lungsod sa Sibonga. Samtang ang suspetsado naila nga si Antonio Marivelles Torres, 24, molupyo sa barangay Dugo-an sa lungsod sa Sibonga.

Si PO1 Ronnie Cui sa pakighinabi sa Banat News nagkanayon nga padung sa tabo ang biktima aron magtumod sa iyang mga kopras luwan sa iyang kabaw dihang kini gitigbas sa suspek nga nag-atang daan ug nagtago sa usa ka multicab.

Ang suspek gikatahong kalit nga mitigbas sa biktima diha sa liog, kamot ug tiil. Matud ni Cui hapit maputol ang liog sa biktima. Ang suspek nadakpan sa kawayanan sa barangay Dugo-an ug nakuha ang gikan kaniya ang usa ka pinote.

Ang suspetsado nga nahinabi sa Banat News pinaagi sa telepono nagkanayon nga sa sayong buntag kagahapon, padulong unta siya manguha og kompay aron ilawog sa iyang hayopan. Sumala pa niya nga samtang nanghimatiis siya nagsigi og tutok kaniya ang biktima nga padulong sa merkado sa Papan aron magtumod og kopras nga lubi.

Matud pa sa suspetsado nga nilikay na lang siya og agi sa dalan aron di niya ikasugat ang biktima padulong sa barangay Kagay kay usa ra ang dalan niini nga maoy gisubay sa biktima.

Apan dihang milugsong na siya, diha na sa iyang luyo ang biktima nga isog kaayo og tinan-awan ug tungod sa kabalakang maunhan iyaha kining gitigbas kay daan na kining nagdumot sa ilang pamilya. Sumala pa sa biktima nga pipila na ka higayon nga mibahad ang biktima nga patyon sila ug gani gipusil sa biktima kaniadto ang ilang balay ug hapit maigo ang iyang inahan.  (BANAT NEWS)