4 nasikop nga may pusil ug shabu

CEBU, Philippines - Nasikop  sa kapolisan  ang  upat  ka tawo kinsa  nagkupot  og  armas  nga  walay  lisensya  ug  shabu atol  sa buy-bust  operation  nga  gilusad  sa  mga  otoridad  sa nagkalainlaing  suok  sa dakbayan sa Mandaue sa miaging  gabii. 

Ang nadakpan mao sila si Danilo Gomez, 42, minyo,  taga sitio Torel sa barangay Tingob, Jay Bacusmo, 33, Antonio Sanoria, 18  nga pulos taga barangay Maguikay ug Diolito Comendador, 37,  nga lumad nga taga Sogod, Cebu ug temporaryo nga nagpuyo sa sitio Ihawan sa barangay Mantuyong sa maong dakbayan. 

Si SPO1 Renato Canja sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan miingon nga si Gomez ilang nadakpan alas 11:00 pasado ang takna sa  gabii human sa pipila ka mga adlaw nilang  pagpaniid sa illegal niining kalihokan sa maong lugar. 

Nasakmit  nila  gikan  niini ang usa ka pakete nga shabu bugti usab sa P400 nga marked money nga maoy gibayad sa usa  ka  police decoy.  Dugang pa ni  SPO1 Canja nga sila si Bacusmo ug Sanoria ilang nadakpan human  nila  madawat ang alarma  kalabot sa duha ka armadong lalaki sa sitio Tokyo sa barangay Maguikay alas 12:00 pasado ang takna sa gabii. 

Sa ilang  pagsusi  ilang naabtan si Bacusmo ug Sanoria  ug ilang nasakmit ang armas nga kalibre .22 ug kalibre .38 nga revolver  nga  may  mga  bala.  Samtang si PO2 Jesson Estrera sa kapolisan sa Presinto 1 sa MCPO nga nagbase sa barangay Centro miingon nga nakadawat na sila og taho labot sa illegal nga kalihokan ni Comendador sa maong lugar.  (Romeo T.  Limpangog/WC)

Kong. Samsam may balaudnon nga English ipagamit sa pagtudlo

Gitinguha ni Kongresista Gerald Anthony “Samsam” Gullas, Jr. sa unang distrito sa probinsiya sa Sugbo  nga  makalusot ang  iyang  balaudnon   nga English maoy gamiton sa pagtudlo sa mga tunghaan.

Gibutyag ni Samsam nga ang maong balaudnon nga “English is the Medium of Instruction” iya pang gipabasa  sa iyang apohan nga si kanhi kongresista Eduardo Gullas.

Gipasabot sa batan-ong kongresista nga kun English maoy gamiton sa pagtudlo sa mga tunghaan dako  kini og ikatabang sa  pagpauswag sa nasud tungod kay ang mga  bag-ong henerasyon dali ra nga makatrabaho dili lang dinhi sa nasud kundi  lakip na ngadto sa gawas. Gawas sa maong balaudnon buot usab matuman ni Samsam ang  damgo sa iyang apohan bahin sa pagpatuman sa proyekto nga Light Rail Transit  (LRT) dinhi  sa Sugbo.

Matud ni Samsam nga sama sa iyang apohan nakita niya  nga ang maong public transport system gikinahanglan kaayo  sa Sugbo.

Ang LRT maoy sulbad sa naghuot nga trapiko sa Metro Cebu ug gilauman usab niya nga mapauswag pa niini ang ekonomiya sa Sugbo kun  ikapatuman  kining  maong sistema. (BANAT NEWS)