2 giluba angol sa sakop sa Crips

CEBU, Philippines - Duha ka tinun-an sa high school ang gidunggab angol sa grupo sa mga batan-on nga giingong sakop sa Crips Gang atubangan mismo sa Guadalupe Elementary School sa barangay  Guadalupe, dakbayan  sa Sugbo sa alas 9:40 sa miaging gabii.

Ang mga biktima pulos mga  menor de edad  padulong nga unta nga  mouli sa ilang balay apan gikatahong gibabagan sila sa usa ka pundok sa mga batan-on sa maong  lugar.

Samtang sa upat ka mga suspetado tulo niini pulos usab menor de edad ug nagtungha  usab  sa high school.

Ang usa ka lalaki nga ilang  kauban nga nailhan sa ngalan nga Arning, 22, molupyo sa sitio Mayupay, barangay Quiot sa dakbayan sa Sugbo.

Misukol  kuno  og sinumbagay  ang  mga  biktima batok  sa mga miatang  kanila ug dihang nakit-an sa usa ka   biktima nga gidunggab na ang iyang amigo misuway siya  sa pag-uwang  niini.

Apan gidunggab  usab  hinuon  ang  iyang buko-buko sa usa sa ilang mga kontra.

Ang mga biktima daling gidala sa Vicente Sotto Memorial Medical Center sa patrol car sa Guadalupe Police Station nga kinuyogan sa ilang mga magtutudlo.

Matud pa nga ang usa sa mga menor nga ilang  gikaaway  sa maong  higayon  kalalis sa usa  sa duha  ka  biktima niadtong Disyembre 14, 2013.

Ang mga biktima padayon pang nagpa-alim sa ilang samad dinunggaban sa tambalanan, sumala  pa  sa kapolisan, samtang  gihikay na  ang  kaso  nga  ipasaka  batok  sa mga suspek. (BANAT NEWS)