1 patay 2 angol sa pamusil
CEBU, Philippines - Usa ang patay ug duha ang angol sa pagpamusil sa gituohang bangi sa fraternity didto sa Barangay Pitogo, lungsod sa Consolacion kagahapon sa kaadlawon.
Patay nga nalanding sa Eversley Child Sanitarium Hospital si Chris Almaden, 22, taga Juan M. Ceniza St., sa Barangay Looc, dakbayan sa Mandaue, human makaangkon og samad pinusilan sa dughan.
Samdan ang mga kauban niini nga sila si Cenaro Pepito, 30, taga Barangay Tayud, Consolacion, human maigo sa tuong bukton ug si Lionel Ilendrino, 25, taga Barangay Catarman, Lilo-an nga naigo usab sa iyang buko-buko.
Ang duha daling gidala sa Vicente Sotto Memorial Medical Center sa dakbayan sa Sugbo.
Sa imbestigasyon ni Insp. Franco Rudolf Oriol sa Consolacion Police Station nasuta nga nag-inom sulod sa videokehan nga gipanag-iya ni Joyvelyn Mata ang mga biktima sa dihang miabot ang duha ka suspek sakay sa motorsiklo.
Matud pa nga armado ang back rider niini nga daling namusil batok sa tulo ka mga biktima.
Gihulagway sa usa ka saksi sa hitabo nga ang suspek nagsul-ob lang og loose nga T-shirt, nga kolor puti ug nagkawo.
Base sa imbestigasyon sa kapolisan ilang nasuta nga posibleng bangi sa fraternity ang hinungdan sa maong pagpamusil kay ang maong videokehan estambayanan man sa mga miyembro sa Bloods gang. (BANAT NEWS)
- Latest
