Sundawo sa Australia ug Italy mamiya na
CEBU, Philippines - Pormal na nga mibiya kagahapon ug karong adlawa ang mga sundawo sa Air Force sa nasud sa Australia ug Italy human sa ilang humanitarian mission dinhi sa nasud sa trahedya sa bagyong Yolanda sa lalawigan sa Leyte.
Si Australian Air Force Wing Commander Lt. Col. Jarrod Pendlebury ug Italian Air Force Commander Maj. Macri Carmelo emotional sa ilang pagsaysay sa kasinatian niini sa ilang pagpahigayon og tabang sa mga biktima sa bagyong Yolanda didto sa dakbayan sa Tacloban ug Ormoc.
Kini tungod kay matud pa sa maong opisyal nga mao pa kini ang unang higayon nga sila nakasugat sa grabeng kadaut sa maong mga dapit.
Matud pa ni Lt. Col. Pendlebury nga 513 sa ilang mga sakop lakip na ang mga engineer nga naglangkob sa grupo nga mipahigayon og clearing operations sa maong dakbayan.
Ang maong pundok naghatag usab og mga hinabang sa mga biktima sa bagyo sulod sa usa ka bulan nga operasyon.
Apan karon andam na sila nga mobiya balik sa ilang nasud apan misaad kini nga andam gihapon sila nga mobalik nganhi ug moabag sa mga Filipino nga mangayo sa ilang tabang.
Hinuon mipadayag si Maj. Carmelo nga ilang ibilin ang mga ekipo nila sa hospital isip donasyon nila ngadto sa lokal nga kagamhanan sa Ormoc pinaagi sa pakigsabot sa ilang Italian Ambassador.
Matud pa ni Australian Defense Force Commander Lt. Col. Rod Lang nga mapasigarbuhon kaayo sila nga nalakip sila sa nakatabang sa mga Filipino sa dakong panginahanglan niini.
Gipadayag ni Lt. Col. Lang nga nakita niya nga kontrolado na sa nasud ang sitwasyon hinungdan nga sila mobiya na ug alang kanila kompleto na ang ilang mission sa katawhan.
Miabot ang puwersa sa Australian Defense Force niadtong Nov. 13, 2013 pinaagi sa ilang kahimanan sa kahanginan ug kadagatan ug miserbisyo sa mga biktima sa Tacloban, Ormoc, Guiuan, Roxas, Cebu ug Bantayan Island. (BANAT NEWS)
- Latest
