ABC race sa Cebu City karong adlawa

CEBU, Philippines - Ang kandidato ni Mayor Michael Rama pagka presidente sa Association of Barangay Councils (ABC) misaad nga kun siya modaug sa eleksyon karong adlawa awhagon niya ang tanang kapitan sa barangay nga estrikto g’yud nga ipatuman ang balaud diha sa tagsa-tagsa nila ka barangay.

Si Tisa Barangay Captain Philip Zafra miingon nga himoon niya ang iyang barangay nga “pilot project” diin hapsayon kini aron maoy mahimong ehemplo sa ubang mga dapit dinhi sa dakbayan.

Giangkon ni Zafra nga dunay mga karsada sa iyang barangay nga nagkagamay tungod sa mga mapahimuslanong lumulopyo nga mipalapad sa ilang kabalayan hinungdan nga maglisod ang mga bombero pag-agi kun adunay sunog.

Si Mayor Michael Rama sa sayo pa miingon, nga ang mga opisyal sa kabarangayan angay nga mopakita gyud og kasinsero sa ilang serbisyo alang sa kalamboan sa barangay.

Si Zafra nga kanhi chief of staff sa opisina sa mayor miingon nga iyang paninguhaon nga makatabang usab ang mga opisyal sa kabarangayan nga mapadali ang tinguha ni Rama nga mapatukod pagbalik ang bag-ong ospital sa dakbayan.

 Nahibaw-an nga si Zafra magtigi og si Capitol Site Barangay Captain Manuel Guanzon sa pagka presidente sa ABC. Si Guanzon maoy kandidato nga gisuportahan sa mga kapitan nga alyado sa Bando Osmeña Pundok-Kauswagan (BOPK).

Ang ABC elections adto himoa sa ilang opisina sa South Road Properties (SRP) karong buntag.  (BANAT NEWS)