Ang di motambong sa flag ceremonies silotan

CEBU, Philippines - Gibaharan karon ni Talisay City Mayor Johnny De los Reyes ang tanang mga kawani sa siyudad nga kinahanglang motambong gyud sila sa flag-raising ug flag-retreat ceremonies kung dili sila buot nga masuspenso.

Kini human maobserbahan sa mayor nga daghang mga kawani ang tapolan na kaayong motambong sa maong seremonyas. Ang memorandum sa mayor ipatuman sugod karong Enero 2014.

Ang oras tingtrabaho  sa Talisay gikan sa Lunes hangtud sa Biyernes  magsugod alas 8 sa buntag hangtud alas-12 sa udto ug mobalik sa ala 1 sa hapon ug manguli alas 5 sa hapon. Ang flag-raising ceremony magsugod alas- 8 sa buntag kada Lunes ug ang flag-retreat alas- 5 sa hapon kada Biyernes. Ang memorandum nagmando sa tanang city hall employees nga on-duty pagtambong niini.

Exempted hinuon sa maong seremonyas ang kadtong anaa sa utility and sanitation work; civil security/security guards; ticket checkers; mga mabdos nga empleyado ; dunay sakit sa panit ug kadtong hinay og resistensya. Ang di motuman niini, warningan sa unang higayon, written reprimand sa ikaduhang higayon ug suspension sud sa usa ka buwan sa ikatulong kalapasan. (BANAT NEWS)