Polis way grupo sa tulisan nga namonitor
CEBU, Philippines - Walay namonitor nga mga dagkong robbery group sama sa Martilyo Gang sa kaulohan nga posibling moigo sa Sugbo, matud pa sa hepe sa Regional Intelligence Division sa Police Regional Office 7 Sr. Supt. Paul Labra.
“Actually sa ako nang gipang-announce before sa mga media conferences nga wala tay namonitor gyud nga big time nga mga organized robbery group nga atong masigpatan diri nga ang targets is mga financial institutions o mga pawnshops,†sumala pa ni Labra.
Apan matud ni Labra nga bisan pa niini, iya gihapong gimandoan ang mga intelligence units sa rehiyon nga padayong magmonitor sa nagkalainlaing krimin.
Miingon si Labra nga tungod sa hitabo sa pag-ataki sa Martilyo Gang sa SM North sa kaulohan iyang gimandoan ang iyang mga sakop nga hingusgan gyud ang ilang pagmonitor sa mga mapahimuslanong mga tawo.
“With the recent incident that happened in Metro Manila gabii gyud dayon nagpagawas gyud ko’g reminder, atong gibalik ang pagpakusog sa target hardening measures,†dugang ni Labra. Sumala pa ni Labra nga basi sa imbistigasyon sa kaulohan nasuta nga didto ra pod sa sulod sa mall gipalit ang mga martilyo nga gigamit sa mga suspetsado.
Midugang siya pag-ingon nga wala mabantayi sa tindahan hinungdan nga nakasulod ang mga armas nga gidala sa mga suspetsado.
“Something is wrong sa mga security measures nga gibutang sa mga tindahan nganung wala nabantayan,†dugang ni Labra. Busa gihatagan ni Labra og direktiba ang iyang mga intel personnel sa pakig-alayon sa mga security supervisor sa mga mall aron di mahitabo ang samang insidente dinhi sa Sugbo. (BANAT NEWS)
- Latest
