Kadaot sa panginabuhi sa mga mananagat sumadahon

CEBU, Philippines - Andam  nga  sumadahon  sa kagamhanan  ang  mga kadaot nga nahiaguman  sa  mga  mananagat  sa  lungsod  sa Cordova  gumikan sa oil  spill    nga  mugna  sa  panagbangga  sa duha ka  barko  sa kadagatan  sa dakbayan  sa  Talisay  pipila na  ka buwan ang  milabay.

Si Ed  Llamedo,  tigpamaba  sa Department  of  Environment  and  Natural  Resources (DENR)  mibutyag  sa Banat News  nga  nagpaabot  sila nga  dapiton  alang  sa panagtagbo  sa  mga  kadagkoan  sa lokal  nga  kagamhanan  sa lungsod  sa Cordova.

Sayo  niini  si  Mayor Adelino  Sitoy  sa Cordova  mitakda  og  usa  ka  panagtagbo  sa taga  DENR  ug  sa  mga  tinugyanan  sa Coast  Guard aron sumadahon  ang  kadaot  nga  nahimo  sa oil  spill  sa panginabuhi  sa kaliboan  ka  mananagat  sa Cordova.

Matud  pa  ni  Sitoy  nga  ang  duha  ka  kompaniya  sa barko  wa  makahatag  og  hinabang  sa  mga  mananagat.

Apan  ang  miabaga  sa pagkaon  sa daghang  mananagat nga nawad-an  og  panginabuhi  niadtong  naglaaw  pa  ang  asayte  sa ilang  kadagatan  mao  ang  DENR. Kini  pinaagi  sa pagpatanom  og  mga  lubangon  sa bakhaw    sa mga  asawa  ug  mga  anak  sa  mga  mananagat   nga  gibayran  usab  sa  DENR.

Gumikan  niini  gusto  ni  Sitoy  nga  pugson  ang  tagdumala sa duha  ka  mga barko  nga  mohunahuna  usab  sa ilang  obligasyon  sa  panginabuhi  sa  mga  biktima.

Ang  oil  spill  mugna  sa MV St.  Thomas  Aquinas  nga  nalunod  human  kini  dasmagi  sa barko  nga  iya  sa Sulpicio  Lines Inc.  didto  sa kadagatan  sa Talisay pipila  na  ka  buwan  ang  milabay. (BANAT NEWS)