Lima ka drug suspects nasikop
CEBU, Philippines - Lima ka lalaki ang nasikop samtang usa ang nakaipsot sa managlahing buybust operation nga gipahigayon sa kapolisan sa lalawigan sa Sugbo sa miaging adlaw.
Nasikop sa hiniusang kusog sa Provincial Intelligence Branch ug Provincial Anti Illegal Drugs Special Operations Group ang tulo ka lalaki human mibaligya kini og shabu sa police poseur buyer sa dalan Rafols sa dakbayan sa Toledo sa alas 5:30 sa miaging gabii. Ang nasikop mao sila si Julius Book alyas Boy, Josephus Book, ug Richard Caballero, molupyo sa dakbayan sa Toledo.
Nakuha gikan kanila ang duha ka dakong putos sa shabu ug tulo ka gamay nga pakete sa shabu, duha ka P500 nga buybust money, duha ka lighter, upat ka linikit nga aluminum foil, duha ka tissue, ug pipila ka resibo sa money transfer.
Nasikop sab sa kapolisan sa lungsod sa Liloan si Alcio Gacanog, 32, molupyo sa barangay Catarman Liloan ug si Reynan Tanyag, 32, taga barangay Tayud sa lungsod sa Liloan.
Si Gacanog ug si Tanyag nasakpan sa kapolisan nga nag- repack sa shabu sa barangay Tayud. Nakompiskar gikan sa duha ang usa ka medium size nga plastic nga may sulod nga shabu, lighter, plastic straw, clip ug blade.
Samtang nakaipsot ang usa ka gipasanginlang drug pusher Roberto Rivera alyas Meokoy, diha sa lungsod sa Dalaguete sa miaging gabii sa barangay Malones.
Mipalit ang usa ka polis nga gamit ang P1,000 nga buybust money ug dihang mitunol na ang suspek sa polis sa duha ka pakete nga shabu nakabantay kining polis ang iyang ka-transaksyon hinungdan nga mikaratil kini og dagan sa kalibonan ug wala na gyud kini makit-i.
Apan bisan pa man naka-ipsot ang suspetsado pasakaan gihapon kini og kaso sa kapolisan. (/EIM)(BANAT NEWS)
- Latest
