CT-TODA magpatabang sa CITOM aron maayo ang ilang traffic lights
CEBU, Philippines - Magpatabang ang dakbayan sa Talisay sa Cebu City Traffic Office Management (CITOM) aron ipa-repair ang ilang mga nangaguba nga traffic lights kay aron ang mga traffic enforcers nga mano-manong nag-operate niini magamit pa sa ubang karsada.
Si Bise Mayor Romeo Villarante, chairman sa City of Talisay-Traffic Operation Development Authority (CT-TODA) mibutyag nga gitinguha nila ang pagbalik og automation sa mga traffic lights.
Ang CITOM giingong dunay kapabilidad sa pag-ayo sa nahisgutang mga traffic lights ug gikahinabi na niya si Joy Tumulak ang hepe sa operations sa CITOM ug gipaabot na lang sa naulahi ang pormal nilang request.
Ang mga nangaguba nga traffic lights nahimutang kini diha sa Cebu South Coastal Road (CSCR) sa eskina sa dalan Rabaya sa barangay San Roque, San Isidro, Lawaan ug diha sa Tabunok.
Matud ni Villarante naproblema sila sa pagpaayo sa mga traffic lights kay ang mga personnel kaniadto nga suhito niini wala na magtrabaho sa city hall sa Talisay.
Gipasabot ni Villarante nga kung mabalik ang automated traffic lights ang mga gisangonang nag-operate niini nga mga job orders makatabang kini sa pagmando sa trapiko diha sa ubang karsada.
Dugang ni Villarante nga maglisud ang siyudad og palit og mga bag-ong mga traffic lights tungod kay matag usa niini apil na system mokabat ngadto sa P14 milyones.
Kahinumduman nga ang milabay’ng administrasyon naproblema usab sa maong mga traffic lights tungod kay magsige na lang kini og kaguba ug giingong lisud na kaayo kining ayohon tungod kay karaan na ang system nga gigamit niini ug wala nay baligya nga spare parts. (BANAT NEWS)
- Latest
