Mga kompaniya sa Tacloban manira sa negosyo

CEBU, Philippines - Daghan nang mga kompanya sa Tacloban ug ubang bahin sa Leyte ang nagpahibawo nga manira na tungod sa dakong alkansi.

Sigun pa ni  Regional Director  Exequel Sercauga  sa Department  of Labor  and Employment (DOLE) nga dul-an na sa 20 ka mga kompanya  ang miduso sa ilang buhatan og notice of temporary closure.  

 Kini tungod sa grabing epekto sa ilang tagsa-tagsa ka mga negosyo  atol  sa bagyong Yolanda   sa   milabay nga bulan.

Matud  pa  ni  Sarcauga  nga nabalaka karon ang ilang buhatan sanglit mas modaghan pa unyang mga kompanya ang mosunod   sa pagpanira  sa  umaabot   nga adlaw.

Kini tungod kay nagpasabot  kini nga mas daghan usab ang mga kawani nga mawad-an  sa ilang trabaho.

Hinuon  milaum   si  Saracuga  nga makabangon ra unya ang maong mga kompanya tungod usab sa gipatuman nga mga programa sa nasudnong kagamhanan nga nagtabang usab sa mga gagmay ug dagkong negosyante sa maong lugar.

Gitataw  ni  Sarcauga nga  ang ilang buhatan nangandam na niining maong sitwasyon ug andam kining motabang sa mga kawani unya nga mawad-an og trabaho tungod sa pagsira sa mga kompanya sa maong lugar. (BANAT NEWS)