Mga batang may ‘cleft palate’ nga gioperahan didto sa Israel gustong mahimong polis ug doktor

CEBU, Philippines - Miabot na sa dakbayan sa Sugbo ang duha ka bata nga gikan sa Israel nga gioperahan  sa ilang cleft palate o bungi.

Ang mga bata mao sila si Yanny Millor, 13, grade 4 ug si Rex Niño Recto, 10,  grade 3, nagtungha sa Kanagahan Elementary School, molupyo sa barangay Kanagahan lungsod sa San Remegio ug mga survivor usab sa bagyong Yolanda.

Gipakita ang duha ka bata diha sa Montebello Villa Hotel sa Banilad, dakbayan sa Sugbo alas 8:00 sa buntag kagahapon nga giubanan nila ni Gobernador Hilario Davide III, Bise Gobernador Agnes Magpale, Honorary Consul sa Israel nga si Emily Chioson, inubanan sa kapitan sa barangay Kanagahan nga si Jaime Vistar.

Si Jocelyn ug Billeto Millor, mga ginikanan ni Yanny nahinabi sa Banat News, miingon nga dako ang ilang kalipay ug pasalamat sa mga taga Israel ug ni Loy Madrigal  nga maoy nagdala sa mga taga Israel sa ilang lugar ug nakit-an ang iyang anak. “Excited na kaayo mi makakita sa among anak” asoy ni Billeto.

Matud pa ni Jocelyn, ika-walo nga anak si Yanny sa siyam ka magsuon. Tungod sa bagyong Yolanda nga naguba ang ilang panimalay, didto sila temporaryong nagpuyo sa balay sa ilang kapitan. Si Yanny  nga miingon nga sa una mohilak siya kung sungogon og bungi sa iyang mga kaduwa ug karon bisan nihit kaayong motubag apan makita nga kompiyansa na siya sa iyang kaugalingon.

Sumala pa ni Yanny nga gusto siya mamahimong doktor ini’g dako niya aron makatabang sab siya sa mga naa’y sakit.

Samtang si Cresenciana Lopez, apohan ni Rex nahinabi sa Banat News, miingon nga siya na ang nagpadako sa maong bata apil pa ang upat ka mga igsuon niini.

Sumala pa ni Lopez,  ang inahan ni Rex napriso tungod sa ginadiling drugas ug ang amahan nagtagotago sa balaod tungod gihapon sa maong kaso. Ang gibuhi ni Lopez sa apo mao ang iyang pension ug ang Pantawid Pamilyang Pilipino Program (4Ps) sa gobiyerno. Ang pamilyang Lopez usa sa mga nawad-an og balay nagmantiner lang karon sa mga biya sa bagyo nga mga sin ug banig isip ilang kapasilongan.

Samtang kung doktor ang gusto ni Yanny, gusto usab ni Rex nga mamahimong polis ini’g dako na niya.

Si Mark Spenser Vistar, anak sa kapitan sa barangay Kanagahan ug maoy ning uban didto sa mga bata sa Israel nga nahinabi sa Banat News, miingon nga nagpuyo sila didto sa Orinat Hostel nga kauban ra sa ospital nga Schnieders Children Medical Center of Israel kung diin gioperahan ang duha ka bata.

Matud pa ni Mark, tulo ka oras ang operasyon ni Rex ug tulo ka oras kapin ang operasyon ni Yanny.

Human sa operasyon, ang doktor nga nailhan lang ni Mark sa pangalang Dr. Kalish mirekomendar nga magkinahanglan og speech therapy ang mga bata aron mahanas sila sa bag-o nilang  kasinatian.

Si Emily Chioson, honorary consul sa Israel, nahinabi sa tigbalita mibutyag nga ang Israel Foreign Affair maoy nigasto sa operasyon sa mga bata.

“Every child deserves to live a normal life without any rejection from the people around them, they deserve it,” asoy ni Chioson. “I’m sure they will have a bright future,” matud pa usab ni Gob. Davide.  (BANAT NEWS)