Piniriso sa Lapu-Lapu City Jail nakaeskapo

CEBU, Philippines - Pakyas ang mga sakop sa Bureau of Jail Management and Penology o BJMP sa dakbayan sa Lapu-Lapu sa pagsikop og balik sa usa ka binilanggo nga mieskapo sa Lapu-Lapu City Jail kagahapon sa kaadlawon.

Matud pa ni J/Insp. Francisco Bohol ang Deputy Jail Warden sa Lapu-Lapu City Jail nga nabantayan nila nga wa si Rex Armando Mata atol sa ilang pagpahigayon og head count  alas 6:00 sa buntag.

Si Mata adunay kasong kalapasan sa RA 9165 ubos sa Sec. 5, 11 ug 12 sa Art. II o pagpamaligya og illegal nga drugas ug bag-ohay lang kining nasulod sa City Jail sa milabay’ng bulan sa Septiyembre tuig 2013.

Matud pa ni Bohol tanang mga personnel nga nag-duty niadtong higayona maoy gipaubos sa imbestigasyon. Gidudahang  ala 1:30 sa kaadlawon ngadto sa alas 2:30 sa kadlawon kini  nakaeskapo.

Nasayran usab sa Banat News nga nagpatabang ngadto ni Chief Insp. Romeo Santander sa City Intelligence Bureau alang sa pagpakitabang sa pagsikop og balik ni Mata.

Si Santander sa iyang bahin mibutyag nga ilang tabangan ang BJMP pagpangita kang Mata nga duna say laing dalang alyas nga Rikoy ug alyas Michael Tagalog.

Kagahapon sa buntag way mga kabanay sa mga binilanggo ang gitugotang makaduaw sa mga paryente tungod sa pag-eskapo ni Mata. (/EIM)(BANAT NEWS)