Buybust operation usa patay

CEBU, Philippines - Patay ang usa ka gipasanginlang bigtime drug pusher  human napusilan  sa mga polis nga nagpahigayon og buybust operation diha sa sitio Litob ug sitio Lato sa barangay Kalawisan sa dakbayan sa Lapu-Lapu pasado alas-4 sa hapon sa miaging adlaw.

Ang napusilan patay mao si Harold Van Abad, 24 anyos,  kinsa nakuhaan og napulo ka gagmay nga pakete nga gidudahang shabu .

Samtang upat ka mga giingong sakop niini ang nadakpan nga mao sila si Rodulfo  Sumalinog, 73, Joseph Inihao, 26, Candido Noval Mantos, 42,  ug ang usa ka 16- anyos nga anak nga lalaki ni Mantos.

Si  Senior Inspector Rogelio Pineda, hepe sa intelligence section sa Lapu-Lapu City Police Office  (LLCPO) gikataho nga nakabantay si Abad nga  polis ang iyang katransaksyon.

Matud pa ni Pineda nga kalit milanit sa iyang armas nga kalibre 45 si Abad apan naunhan kini pagpusil sa mga operatiba ug napatay.

Ang mga sakop sa Emergency Rescue Unit Foundation  (ERUF) dali usab nga mikarga  kang Abad sa ilang ambulansiya ug gihatod kini ngadto sa tambalanan apan gideklarar kini sa mga doktor nga dead on arrival.

Si Pineda miingon nga si Abad nasakmitan og armas ug nakuhaan pa gyud og napulo ka paketeng shabu.

Samtang si Sumalinog, Inihao ug Mantos nakuhaan og balor P500 mil nga kantidad sa 80 gramos nga shabu.

Lakip sa nakuha sa kapolisan ang cash nga P17 mil kapin nga gituhuang halin sa pagpamaligya og shabu ug drug paraphernalia.

Atol sa pakighinabi sa mga suspetsado si Mantos miangkon sa maong salaud diin bunga kini sa kawad-on human siya moundang sa pagmaneho og taxi.

Si Sumalinog, Inihao ug Mantos Jr. anaa karon gipriso sa Lapu-Lapu detention cell samtang ang 16- anyos gitugyan sa kapolisan sa Department of Social Welfare and Development. (/EIM)(BANAT NEWS)