Bandera sa CCPO gi-halfmast

MANILA, Philippines - Nasubo ang kapolisan sa dakbayan sa Sugbo sa kamatayon ni PO1 Felicisimo Unabia nga gipusil patay sa dakbayan sa Carcar sa miaging adlaw ug gibutang sa halfmast ang bandera sa Cebu City Police Office agi og simpatiya sa pamilya sa biktima.

Si Chief Insp. Enrique Belciña ang hepe sa Police Community Relations sa CCPO miiingon nga magpadayon nga halfmast ang bandera sa CCPO hangtod nga malubong si PO1 Unabia.

Miingon si Belciña nga bisan pa man sa nahiagoman ni Unabia dili unta mabugnaw sa ilang pagserbisyo ang  mga  kapolisan.

Sumala pa ni Belciña nga matag panahon nga adunay polis nga mapatay maningkamot  gyud  sila sa pagtabang sa mga pamilya niini. Si Unabia gipusil patay sa duha ka mga lalaki nga nagsakay og motor didto sa   barangay Poblacion sa dakbayan sa Carcar samtang nag-atang kini og sakyanan.

Ang maong polis padulong pa unta nga motrabaho sa alas 10:00 sa gabii ug namatay kini sa tambalanan.

Nasikop sa kapolisan sa dakbayan sa Carcar ang duha ka mga lalaki nga sila  si  Marvin Binoya, taga  Barangay Poblacion 3 ug si Juanito Linggatong, taga Agusan Del Norte, sa Barangay Poblacion nga gidudahang maoy mipusil kang Unabia.

Positibong giila ang duha sa maguwang sa gipatay human niya makita ang CCTV footage sa pagpusil patay ni PO1 Unabia. (/WC)(BANAT NEWS)