VECO giawhag nga di apilon sa rotational brownouts ang mga night high schools
CEBU, Philippines - Ang konseho sa dakbayan sa Sugbo miawhag sa kadagkoan sa Visayan Electric Company (VECO) nga dili unta iapil sa “rotation brownout†ang mga dapit nga adunay night high schools aron dili maapektahan ang pagtoon sa mga tinun-an.
Giaprobahan sa Cebu City Council ang resolusyon ni Konsehal Eugenio Gabuya Jr. nga nagpadayag og kabalaka nga maapektahan ang pagtungha sa mga bata kun kanunay ang brownout sa mga dapit nga ipahigayon ang night high schools.
Malaumon ang konsehal nga hatagan unta og pagtagad sa kadagkoan sa VECO ang awhag sa City Council.
Ang kopya sa giaprobahan nga resolusyon ni Gabuya ipadala sa labing dali nga panahon ngadto sa kadagkoan sa VECO.
Kaniadtong miaging gabii, dunay mga ginikanan nga mireklamo sa Banat News tungod kay dihang miigo ang brownout sa Barangay Kalunasan gihakop sila og kabalaka sa kahimtang sa ilang mga anak.
Matud pa nga wala dayon pagawasa sa mga maestra ang kabataan kay nagpaabot pa sila nga mobalik pagsiga ang suga sanglit duna pa sila’y leksyon nga angay’ng diskutihon.
Si Gabuya miingon nga dili na kinahanglan nga pahibaw-on sa VECO kun unsa nga mga tunghaan nga adunay night classes ang maigo sa rotational brownouts. (BANAT NEWS)
- Latest
