Babaye misuway og ambak sa Mactan Bridge

CEBU, Philippines - Usa ka babaye ang napakgang human misulay  og ambak sa Mactan- Mandaue  Bridge nga nakamugna og panaghuot sa mga sakyanan alas-6 pasado ang takna sa buntag human naluwas sa mga sakop sa Emergency Rescue Unit Foundation (ERUF) ug gidala sa tambalanan.

Si PO1 Felix Cabaning sa Special Weapon and Tactic (SWAT) team sa Lapu-Lapu City Police Office (LLCPO) nga nahinabi sa Banat News miingon nga ang maong babaye  ilang naabtan nga nagpatong sa trusses sa ilawom tunga-tunga nga bahin sa maong taytayan.

Dugang pa niya nga giduol kini nila alang sa paghangyo nga mobalik og saka sa ibabaw nga bahin sa taytayan apan mohana kini sa pag-ambak hinungdan nga milanat gyud og kapin sa duha ka oras nga nakamugna kini og trapiko.

Matud pa ni Cabaning nga ang mga sakop na sa ERUF maoy hinayhinay nga nakapaduol sa maong babaye ug nakahigayon sa paghigot og pisi sa lawas niini ug dali nga gibira pasaka sa ibabaw nga bahin sa taytayan.

Si Cabaning miingon nga ang maong babaye nga ilang gisukitsukit igo lamang nga nakatug-an sa iyang pangalan ug mitug-an usab kini nga nagpuyo sa dakbayan sa Mandaue apan wala makahisgot sa barangay nga gipuy-an niini.

Sa dugang pa nilang pagsukitsukit ilang namatikdan nga daw wala na kini sa iyang kaugalingon maoy nakaaghat sa mga sakop sa ERUF nga dad-on na lamang kini sa Vicente Sotto Memorial Medical Center sa dakbayan sa Sugbo. (BANAT NEWS)