Carnapping sa Talisay mibalik na sab

CEBU, Philippines -  Si Talisay City councilor Danny Caballero ug chairman sa komitiba sa kahusay ug kalinaw nanawagan sa kapolisan alang sa higpit nga operasyon batok sa kriminalidad.

Sa milabay’ng adlaw’ng Martes dunay sunod-sunod nga hitabo sa carnapping ug tulis sa siyudad. Mga alas 12:10 sa kaadlawon sa nahisgutang adlaw si Frederick Lim Reville, Jr., 24, taga barangay Pasil, dakbayan sa Sugbo ug Jessi Cabo Dela Peña, 20, residente sa barangay Cansojong, Talisay nangabiktima sa pagpanulis sa duha ka mga wala mailhing lalaking nagsakay og motorsiklo.

Pipila ka minutos ang nakalabay si Francisco Roblon Gumera, 44, usa ka pintor ang mi-report sa kapolisan kay gidagit ang iyang motorsiklo sa wala mailhing kawatan.

Sa alas 2:30 sa kaadlawon sa samang adlaw, usa ka Ronnel Jade Gabin, 29, usa ka technician ang mireklamo usab nga gidagit ang iyang motorsiklo.

Sa maong sitwasyon si Caballero miawhag sa kapolisan sa siyudad nga pahugtan pa gyud ang ilang operasyon ilabi na ang pagpahigayon og checkpoint diha sa kadalanan aron dili makahigayon ang mga kawatan ilabi na karong holiday seasons. (BANAT NEWS)