Pugante sa koronadal nadakpan dinhi

CEBU, Philippines - Nasikop sa kapolisan ang usa ka pugante nga nag-atubang sa kasong rape ug tulis human kini nasigpatan sa barangay Lamac sa lungsod sa Consolacion sa miaging alas 8:00 sa buntag.

Ang maong pugante naila nga si Mario Saligbon Silva Jr. lumad sa dakbayan sa Koronadal sa South Cotabato kinsa mipuga sa Bureau of Jail Management and Penology sa dakbayan sa Koronadal niadtong 2010.

Nagtago-tago si Silva sa Mindanao ug Manila ug nakahukom kini nga motago sa usa ka balay niini sa Consolacion.  

Ang mga operatiba sa Provincial Intelligence Branch (PIB) misikop kang Silva pinasikad sa alias warrant sa kasong rape ug tulis nga gi-isyu ni  Regional Trial Court acting presiding judge Jordan Reyes sa Branch 24 sa dakbayan sa Koronadal sa South Cotabato.

Si SPO1 Reynaldo Solante, ang arresting officer, miingon nga armado si Silva dihang ilang gidakop tungod kay duna siya’y .357 revolver ug  .380  nga pistola.

Ang suspetsado naa na karon natanggong sa karsel sa kapolisan sa Consolacion samtang giandam pa ang paghatod niini ngadto sa dakbayan sa Koronadal.

Napriso si Silva human siya ug ang iyang mga kauban nga nagsakay og motor mitulis ug milugos sa usa ka babaye nga estudyante sa kolehiyo nga padulong na unta mouli sa ilang balay niadtong tuig 2010. (BANAT NEWS)