Biktima sa Yolanda gipatrabaho sa DOLE

CEBU, Philippines - Mikabat  sa 480 ka mga  biktima sa bagyong Yolanda ang  gipatrabaho sa kagamhanan alang sa "Clearing Operations" sa amihanang  Sugbo .

Atol sa PIA forum  kagahapon   ang hepe  sa Department of Labor and Employment (DOLE) Provincial Field Office, Maria Grace Diaz mipadayag nga ang  480 ka  tawo  nasulod  ubos  sa “emergency employment” nga sistema  sa DOLE.

Midugang  si Diaz  nga  ang  emergency  employment  gimugna  sa maong ahensya  aron makatabang  sa mga  nabiktima  sa  dili pa dugay  nga  kalamidad nga  nawad-an  og  balay ug panginabuhi.

Matud pa ni  Diaz  nga ang 480 ka mga trabahante gidestino  sa  mga   lungsod sa Daan Bantayan, Medellin, Bogo, San Remegio, Sta. Fe, Madridejos ug Bantayan Island.  Ang  ilang  trabaho  mao  ang  pagpanghinlo  sa  kadalanan   ug mga  kanal  sa daplin  sa karsada.

Human  sa maong  bagyo,  dugay-dugay  naagian  og  sakyanan  ang  mga  karsada  sa amihanang  bahin  sa Sugbo  gumikan  sa  mga kahoy, lubi  ug  poste  sa elektrisidad  nga  nangabali ug  nangatumba  ug  mibabag  sa karsada.

Midugang  si  Diaz  nga gisuholan  nila  og  minimum  nga  suweldo  ang  matag  trabahante  nga gipatrabaho  sa DOLE. (BANAT NEWS)