Driver gibuslotan sa liog angol

CEBU, Philippines - Nabuslot ang  liog   sa usa ka drayber  sa traysikad   nga gipusil  angol sa  iyang  silingan   didto sa barangay Cogon, lungsod Cordova  sa miaging gabii.  Ang biktima mao si Mario Abano, 47, minyo nga nagpuyo sa maong dapit  samtang  ang suspetsado  mao usab si Benjie  Maloloy-on, hingkod  ug bana sa ig-agaw nga babaye sa biktima.

Si SPO2 Llovero Beroy Agusto sa kapolisan sa maong lungsod nga nahinabi sa Banat News miingon nga naglingkod  sa sidecar sa iyang traysikad ang biktima samtang nagpaabot og pasahero sa maong dapit.

Ang suspetsado nga nagsakay og  motorsiklo kalit lang nga mihunong sa atubangan sa  traysikad ug  gipusil   ang biktima hinungdan   nga nalungag sa liog niini. Gihatud  dayon  ngadto  sa Vicente  Sotto Memorial  Medical  Center  sa dakbayan  sa Sugbo  ang  biktima.

Matud ni SPO2 Agusto nga human sa maong pagpamusil dali nga miikyas  ang suspetsado sa giluwanan niining motorsiklo. Karaang  panagbangi  ang  motibo  sa maong  pagpamusil  ug  gipangita  pa  sa kapolisan  ang suspek. (BANAT NEWS)