Sunog na sab 4 angol

CEBU, Philippines - Upat ka  tawo  ang  naangol  sa sunog  nga  miugdaw  og kapin sa 200 ka mga balay  nga miigo sa mga barangay Quiot ug Kinasang-an sa dakbayan sa Sugbo pasado ala una  kagahapon sa kaadlawon.

Matud pa ni Chief Insp. Rogelio Bongabong Jr. nga  usa sa  naangol mao  ang usa  ka  bombero nga si SFO1 Lorenzo Cabigas Jr.,  usa ka tuig nga bata kinsa  napaso sa kayo sa iyang dapi-dapi ug  buko-buko nga wala pa maila, Tommy Satulombom, ug  ang  usa  nga wala hiilhi kansang  tiil  nasamad  sa bildo.

Si Cabigas  napaso  sa kayo  dihang  nahagsa ang  nagsiga  nga  plywood  sa iyang  buko-buko. Si Satulombon napaso   samtang  misalbar  sa iyang anak, mga  butang, ug  kuwarta.

Matud niya nga gawas  sa iyang  anak, gitangtang  pa  niya ang bolt sa ilang flat screen nga tv  ug sa iyang laptop samtang naglibot na ang  kayo  sa ilang  balay  ug migawas  siya  nga  paslot na ang dunggan ug walang abaga kay  nasilab  sa kayo.

Samtang matud pa sa mga residente sa Quiot nga sa wala pa magsugod ang sunog may  silingan  silang lalaki ug babaye sa usa sa mga balay sa sitio Camansi nga nag-away.

Dayon  may  milagubo ug  nagdinaganay  ang mga tawo.

Si Eden Dura, usa sa nasunogan nagkanayon  nga nakadungog pa siya sa usa ka babaye nga naghilak  ug miingon nga “wala gyud nako to tuyoa.”

Matud pa ni Dura nga iya na lang nabantayan nga nasunog na ang balay sa iyang silingan mao  nga gisiguro niya pagpangita ang iyang mga anak aron makadagan.

Matud pa sa kabomberohan nga nadawat nila ang maong alarma sa ala 1:35 sa kaadlawon ug nadeklarar kini nga under control sa pagka-alas 2:55 o usa ka  oras  kapin  human  kini  moulbo

Gibanabana  nga mikabat og P1.5 milyon ang danyos sa maong sunog nga miugdaw sa kapin sa 200 ka mga balay sa sitio Camansi ug Mahayahay sa barangay Kinasang-an ug sitio Camansi ug Idiang sa barangay Quiot. Sa miaging Martes, mikabat  usab  sa kapin  sa 200  ka balay  ang naugdaw  sa sunog  nga  miigo  sa barangay  Carreta, dakbayan  sa Sugbo. (BANAT NEWS)